Xorvatiyalikni bundan keyin nima kutmoqda? Luka Modrichning "Real" uchun ahamiyatini ortiqcha baholash qiyin. Dunyoning eng yaxshi yarim himoyachilaridan biri 2012 yildan buyon uning tarkibida o‘ynab kelayotgan "qirollik klubi"ga katta foyda keltirdi. Xorvatiyalik futbolchi 13-mavsumini Ispaniya poytaxtida o‘tkazmoqda. Dunyoning eng talabchan klublaridan birida uzoq vaqt davomida o‘zini ko‘rsata oladigan futbolchilar kam. Ammo eng yaxshilari ham, afsuski, qariydi.
Modrich allaqachon 38 yoshda. Uning holatida yoshga qarash mutlaqo to‘g‘ri emas. Uning yoshida Luka hali ham yaxshi va ko‘plab jamoalarga yordam bera oladi, jumladan, "Real"ga ham.
Ammo Peres bir necha yil oldin yoshartirish kursini belgilab qo‘ygan va buni hisobga olish kerak. Hozirda xorvatiyalik futbolchi "Blankos" tarkibidagi eng keksa futbolchi hisoblanadi. Uning o‘yin vaqti asta-sekin qisqarishini oldindan bilish oson edi. Bu tendensiya o‘tgan mavsumda paydo bo‘lgan va bu mavsumda davom etmoqda.
Modrich bu mavsumda har bir o‘yinga o‘rtacha 40 daqiqa sarflamoqda, bu uning faoliyatidagi eng yomoni. La Ligada u bor yo‘g‘i 3 marta asosiy tarkibda maydonga tushdi va 2 uchrashuvni zaxirada o‘tkazdi. Xorvatiyalik futbolchi o‘yin vaqti bo‘yicha jamoada 15-o‘rinni egallab turibdi, bu esa uni xursand qila olmaydi. Garchi yarim himoyachining o‘zi yozda xuddi shunday vaziyatga tayyor ekanligini bildirgan edi.
Yangi mavsumda jamoa 4-3-1-2 sxemasida o‘ynayapti. Yarim himoya chizig‘i Toni Kroos, Federiko Valverde va Aureliyen Tchuamenidan iborat. Modrich o‘zini yuqoriroq joylashtirishi mumkin edi, ammo Jud Bellingem bu o‘rinni egallab oldi. Hech kim, jumladan, Lukaning o‘zi ham ingliz futbolchisini yangi klub va yangi ligada bunchalik kuchli boshlashini xayoliga ham keltirmagandi. Jud deyarli har bir o‘yinda samarali bo‘lib, g‘alabali gollarini urdi. Uni zaxira o‘rindig‘ida ushlab turish uchun hech qanday sabab yo‘q.
Modrich markaziy yarim himoyada ham o‘ynashi mumkin edi, u yerda prinsipial jihatdan ba’zida joy paydo bo‘ladi, lekin u yerda ham Karlo Anchelotti boshqa o‘yinchilarni afzal ko‘radi. Masalan, Kroosni. Nemisning ham yoshini katta deb hisoblash mumkin, ammo u hali xorvatiyalikdan 5 yosh kichik. Tchuameni o‘tgan mavsumni noaniq o‘tkazdi, lekin u allaqachon barqaror boshlovchiga aylanib bormoqda. Valverde bu maqomga anchadan beri ega. Ammo Eduardo Kamavinga ham borki, u himoyaning chap qanotida o‘z xohishiga qarshi o‘ynashga majbur.
"Real Madrid"da markaziy yarim himoyachilar ko‘p. Yuqoridagilardan tashqari jarohat sabab mavsum boshini o‘tkazib yuborgan Dani Sebalos ham bor. Shuningdek, 2 nafar hujumkor yarim himoyachi Brahim Dias va Arda Guler. Bu futbolchilarning har biri, ehtimol, Gulerdan tashqari, "Real"da o‘ynash uchun yetarli tajribaga ega, ammo ularning hammasida ham tarkibda yetarli joy yo‘q. Nima bo‘lishidan qat’iy nazar, Lukaning o‘yin vaqti tez sur’atlar bilan qisqaryapti. To‘g‘ri, tajribali yarim himoyachi “qirollik klubi” bilan shartnomasini uzaytirganida qatorasiga bir necha uchrashuvni zaxira o‘rindig‘ida o‘tkazishini kutmagandi. 38 yoshida u asosiy tarkibda o‘ynash istagi bilan to‘la edi.
Hozirgi vaziyatda Modrichning kelajagi haqida mish-mishlar ko‘payib borayotgani mantiqan to‘g‘ri. Anchelotti Luka yanvarda "Real"ni tark etmasligini ishonch bilan aytdi. Ammo hozir bu haqda gapirishga erta.
Xorvatiyalik o‘z holatidan allaqachon norozi, yil oxiriga kelib esa vaziyat yomonlashishi mumkin. Joriy ikki turnirga Ispaniya Kubogi qo‘shilishi hisobga olinsa, jamoada rotasiya bo‘ladi. Modrich o‘yin vaqtini oladi, ammo bu qanday vaqt va qaysi turnirlarda bo‘lishi katta savol. Masalan, Chempionlar ligasida "Union"ga qarshi o‘yinda yarim himoyachi 81 daqiqa, "Napoli"ga qarshi esa atigi 25 daqiqa o‘ynagan.
Agar yanvargacha Lukaning ahvoli jiddiy o‘zgarmasa, u "Real"ni tark etishi mumkin. Jarohatlar bilan bog‘liq muammolar bo‘lmasa, klub uni mavsum o‘rtasida qo‘yib yuborishi mumkin. Shu munosabat bilan yarim himoyachiga yaqinda MLS klublari, xususan, “Inter Mayami” qiziqish bildirmoqda. Mish-mishlarga ko‘ra, Lionel Messi o‘zining sobiq raqibini jamoadoshi sifatida ko‘rmoqchi.
"Inter Mayami"da yaxshi jamoa bor, lekin Messining yo‘qligi ularda kreativlik yetishmayotganini ko‘rsatdi. Modrich jamoaning o‘rta chizig‘ida Serxio Buskets va yosh Benjamin Kremaski bilan birga yaxshi joylashishi mumkin edi. “Real” yetakchilaridan birining “Barselona”dagi sobiq raqiblari safiga qo‘shilishi esa ko‘pchilikning e’tiborini tortadi. Luka va Busketsning o‘zaro munosabati, ayniqsa, ikkita buyuk usta va uzoq muddatli prinsipial raqiblar bir jamoada o‘ynashsa, qiziqarli bo‘ladi.
