Ayni damda "Arsenal" ixtiyorida ikkita sifatli darvozabon bor. Ulardan biri David Rayya bo‘lsa, boshqasi bizlarga yaxshi tanish bo‘lgan Aron Ramzdeyldir. Xo‘sh, ular 2023/24 yilgi mavsumda qanday natija qayd etmoqda?

Ramsdeyl 2021 yilda olib kelingach, Bernd Lenodan asosiy postni tortib olgandi. Angliya terma jamoasi a’zosi o‘tgan mavsumda o‘zining eng yaxshi davrini o‘tkazib, ligada 14 ta quruq o‘yinda ishtirok etdi. Oradan ko‘p o‘tmay, 2023 yilning yozida Arteta yangi golkiper olib kelishga qaror qildi. Rayya "Brentford"dan 27 million funtga sotib olish sharti bilan ijaraga olindi.

"Arsenal" ustozi darvozabon o‘rni ham kafolatlanmaganini ta’kidlab, uni istalgan vaqtda almashtirishini bildirdi. Bu almashtirish kim yaxshiroq sport formasida ekaniga bog‘liq bo‘ladigan bo‘ldi.
"Menimcha, bu yaxshi g‘oya. Men har bir pozisiyani qanchalik bo‘lishi kerakligi haqida o‘yladim. Sifat doimo muhim. Hozir o‘zimiz istagan futbolchilarga egamiz. Hammani o‘yin amaliyoti bilan ta’minlay olamiz. Negaki, oldinda ko‘plab bahslar bor. Har bir pozisiyada rotasiyani amalga oshiramiz. Shunday qilmasak bo‘lmaydi", – deydi Arteta.

Ramsdeyl mavsum avvalida asosiy tarkibda edi. Ammo sentyabr oxiridan beri faqat Rayya maydonga tushmoqda. Ingliz darvozaboni zaxirada o‘tirar ekan, uning kelajagi bilan bog‘liq mish-mishlar urchimoqda. Ko‘plab futbol mutaxassislari ikkita bir xil darvozabonga ega bo‘lish haqida fikr bildirib, kimlardir bu g‘oyani qo‘llab-quvvatladi. Kimlardir esa, yo‘q. Shunday bir vaziyatda har ikki posbonning joriy mavsumdagi natijasiga ko‘z yugurtirmoqchimiz. Quyida shu haqida.

"Arsenal" Ramsdeyl bilan

O‘yinlar: 6 ta
G‘alabalar: 4 ta
Duranglar: 2 ta
Mag‘lubiyat: 0 ta
Quruq o‘yinlar: 2 ta
O‘tkazib yuborilgan gollar: 5 ta
O‘rtacha: 2.33 ochko

"Arsenal" David Rayya bilan

O‘yinlar: 8 ta
G‘alabalar: 5 ta
Duranglar: 2 ta
Mag‘lubiyat: 1 ta
Quruq o‘yinlar: 4 ta
O‘tkazib yuborilgan gollar: 7 ta
O‘rtacha: 2.13 ochko.

ISMATOV J.