Айни дамда "Арсенал" ихтиёрида иккита сифатли дарвозабон бор. Улардан бири Давид Райя бўлса, бошқаси бизларга яхши таниш бўлган Арон Рамздейлдир. Хўш, улар 2023/24 йилги мавсумда қандай натижа қайд этмоқда?
Рамсдейл 2021 йилда олиб келингач, Бернд Ленодан асосий постни тортиб олганди. Англия терма жамоаси аъзоси ўтган мавсумда ўзининг энг яхши даврини ўтказиб, лигада 14 та қуруқ ўйинда иштирок этди. Орадан кўп ўтмай, 2023 йилнинг ёзида Артета янги голкипер олиб келишга қарор қилди. Райя "Брентфорд"дан 27 миллион фунтга сотиб олиш шарти билан ижарага олинди.
"Арсенал" устози дарвозабон ўрни ҳам кафолатланмаганини таъкидлаб, уни исталган вақтда алмаштиришини билдирди. Бу алмаштириш ким яхшироқ спорт формасида эканига боғлиқ бўладиган бўлди.
"Менимча, бу яхши ғоя. Мен ҳар бир позицияни қанчалик бўлиши кераклиги ҳақида ўйладим. Сифат доимо муҳим. Ҳозир ўзимиз истаган футболчиларга эгамиз. Ҳаммани ўйин амалиёти билан таъминлай оламиз. Негаки, олдинда кўплаб баҳслар бор. Ҳар бир позицияда ротацияни амалга оширамиз. Шундай қилмасак бўлмайди", – дейди Артета.
Рамсдейл мавсум аввалида асосий таркибда эди. Аммо сентябрь охиридан бери фақат Райя майдонга тушмоқда. Инглиз дарвозабони захирада ўтирар экан, унинг келажаги билан боғлиқ миш-мишлар урчимоқда. Кўплаб футбол мутахассислари иккита бир хил дарвозабонга эга бўлиш ҳақида фикр билдириб, кимлардир бу ғояни қўллаб-қувватлади. Кимлардир эса, йўқ. Шундай бир вазиятда ҳар икки посбоннинг жорий мавсумдаги натижасига кўз югуртирмоқчимиз. Қуйида шу ҳақида.
"Арсенал" Рамсдейл билан
Ўйинлар: 6 та
Ғалабалар: 4 та
Дуранглар: 2 та
Мағлубият: 0 та
Қуруқ ўйинлар: 2 та
Ўтказиб юборилган голлар: 5 та
Ўртача: 2.33 очко
"Арсенал" Давид Райя билан
Ўйинлар: 8 та
Ғалабалар: 5 та
Дуранглар: 2 та
Мағлубият: 1 та
Қуруқ ўйинлар: 4 та
Ўтказиб юборилган голлар: 7 та
Ўртача: 2.13 очко.
ИСМАТОВ Ж.
