“Andijon” – OKMK (0:1) o‘rtasidagi uchrashuvdan keyin tashkil etilgan matbuot anjumanining dastlabki qismida mehmonlar bosh murabbiyi Mirjalol Qosimov ishtirok etdi.

— Kerakli natijaga erishdik. Albatta, oson bo‘lgani yo‘q. “Andijon” jamoasini o‘rganib chiqqandik. Yuqoridan uzatmalar va qolaversa, kurashlarga boy o‘yin bo‘ldi. Biz shunga tayyorgarlik ko‘rgandik. Bu uzatmalar o‘z-o‘zidan emas. O‘z maydonida “Navbahor”, “Paxtakor” kabi klublarga qarshi ikkinchi planda o‘ynab turib gollar kiritgandi. Jizzaxdagi uchrashuvda ham uzatmadan keyin to‘p kiritib, g‘alabani ilib ketishgandi. Bo‘yi uzun futbolchilari ham bor va biz barchasiga tayyorlangandik. Muhimi, uch ochkoga erishdik. Ikkinchi bo‘limda yigitlar natijani ushlab qolish uchun harakat qilishdi. Bu normal holat.

— O‘yinning oxirida sizda qanday hissiyotlar o‘tdi? Chunki “Andijon” “Paxtakor”, “Navbahor” kabi jamoalarga qarshi oxirgi daqiqalarda gol urib yutib ketgandi...
— Yigitlarimizga ishongandim. Aytyapman-ku, biz tayyor edik. Menimcha, “Paxtakor”ga 85-daqiqada gol urishgandi. Jizzaxda ham o‘yin oxirlarida gol urishdi va u yerda 1:0 hisobida yutqazib turib keyinchalik 1:2 hisobida g‘alaba qozonishgan. “Navbahor”da ham shunday tarzda yutib ketishgan. Bu ham biz uchun o‘ziga yarasha motivasiya edi. Eng yaqin ta’qibchimiz “Andijon” jamoasi edi, ikki ochkoga ortda ketayotgandi. Ko‘p kurashlarga boy o‘yin bo‘ldi.

— Xalqaro o‘yindagi mag‘lubiyatdan keyin jamoani “Andijon”ga qarshi bellashuvga tayyorlash qiyin bo‘lmadimi?
— Albatta, qiyin. O‘zimizga yarasha muammolarimiz bor. Jarohatlar juda ko‘p. Adashmasam, 10 ga yaqin futbolchilarda jarohat bor, bu ham o‘ziga yarasha malaka. Bu sinovdan ham o‘tamiz. Bu – futbol. Sport kontaktlarga boy. Kutilmagan jarohatlar desa ham bo‘ladi. Bu narsadan ham o‘tib olamiz. Bizni qiynayotgani jarohatlar. Nimagaki, oldinda muhim uchrashuvlar bor. Tiklanish jarayoni qiyinchilik tug‘diryapti. Hamma narsa o‘tadi ketadi. Bu ham bir sinov, normal holat, boshqa ilojimiz yo‘q.

“Andijon” matbuot xizmati.