Shotlandiyaning «Seltik» futbol klubi Ispaniyaning «Atletiko» klubi bilan Chempionlar ligasi o‘yinida Falastinni qo‘llab-quvvatlagan 200 dan ortiq jamoa muxlislarining abonementlarini noma’lum muddatga to‘xtatib qo‘ydi.

Avvalroq, «Atletiko» YECHL guruh bosqichi 3-turi doirasidagi «Seltik» bilan safarda durang o‘ynagandi – 2:2.

Uchrashuv «Seltik Park» stadionida bo‘lib o‘tdi. O‘yin davomida «yashil brigada» muxlislar jamoasi a’zolari Shotlandiya klubi rahbariyatining taqiqiga qaramay, Falastinni qo‘llab-quvvatlovchi bannerlarni stadion bo‘ylab ko‘rsatishdi. UYEFA delegati voqeani protokolga kiritdi.

The Telegraph nashrining yozishicha, «yashil brigada» muxlislar guruhining 200 dan ortiq a’zosiga ularning abonementlari keyingi ogohlantirishgacha to‘xtatilgani haqida xabar berilgan.

Shu bois «yashil brigada» Shotlandiya Premyer-ligasining 11-turi doirasidagi «Seltik»ning 1 noyabr kuni «Sent-Mirren»ga qarshi uyinda ishtirok eta olmaydi.

Qayd etilishicha, agar assosiasiya rahbarlari bilan muzokaralar samarali natija bersa, taqiq bekor qilinishi mumkin.

Klubdan kelgan maktubda aytilishicha, keskin choralar ko‘rilishiga sabab – «qayta-qayta sodir bo‘lgan nomaqbul xatti-harakatlar», shuningdek, muxlislarning pirotexnika vositalari va haqoratomuz so‘zlardan foydalanishi bo‘lgan.

Bunday qaror Falastinni qo‘llab-quvvatlash namoyishiga javob emasligi ta’kidlangan.