Шотландиянинг «Селтик» футбол клуби Испаниянинг «Атлетико» клуби билан Чемпионлар лигаси ўйинида Фаластинни қўллаб-қувватлаган 200 дан ортиқ жамоа мухлисларининг абонементларини номаълум муддатга тўхтатиб қўйди.

Аввалроқ, «Атлетико» ЕЧЛ гуруҳ босқичи 3-тури доирасидаги «Селтик» билан сафарда дуранг ўйнаганди – 2:2.

Учрашув «Селтик Парк» стадионида бўлиб ўтди. Ўйин давомида «яшил бригада» мухлислар жамоаси аъзолари Шотландия клуби раҳбариятининг тақиқига қарамай, Фаластинни қўллаб-қувватловчи баннерларни стадион бўйлаб кўрсатишди. УЕФА делегати воқеани протоколга киритди.

The Telegraph нашрининг ёзишича, «яшил бригада» мухлислар гуруҳининг 200 дан ортиқ аъзосига уларнинг абонементлари кейинги огоҳлантиришгача тўхтатилгани ҳақида хабар берилган.

Шу боис «яшил бригада» Шотландия Премьер-лигасининг 11-тури доирасидаги «Селтик»нинг 1 ноябрь куни «Сент-Миррен»га қарши уйинда иштирок эта олмайди.

Қайд этилишича, агар ассоциация раҳбарлари билан музокаралар самарали натижа берса, тақиқ бекор қилиниши мумкин.

Клубдан келган мактубда айтилишича, кескин чоралар кўрилишига сабаб – «қайта-қайта содир бўлган номақбул хатти-ҳаракатлар», шунингдек, мухлисларнинг пиротехника воситалари ва ҳақоратомуз сўзлардан фойдаланиши бўлган.

Бундай қарор Фаластинни қўллаб-қувватлаш намойишига жавоб эмаслиги таъкидланган.