"Navbahor" PFK delegasiyasi Osiyo Chempionlar ligasi (OCHL)ning 4-turidan o‘rin olgan, safarda Eronning “Nassaji Mazandaran” jamoasiga qarshi o‘tkaziladigan uchrashuvda ishtirok etish uchun Toshkent – Sharja – Tehron avia yo‘nalishi bo‘yicha safarga chiqib, Tehron vaqti bilan soat 11:00 da Eron poytaxtiga yetib bordi.
Ertaga OFK Chempionlar ligasi guruh bosqichi, 4-turi doirasida "Navbahor" safarda Eronning “Nassaji Mazandaran” klubiga qarshi bahs olib boradi. Bugun mazkur o‘yin oldidan uchrashuvning tashkiliy masalalariga bag‘ishlangan yig‘ilish o‘tkazildi. Unda har ikki ishtirokchi jamoalar vakillari va bo‘lajak o‘yin mas’ullari ishtirok etishdi.
Yig‘ilishda ertangi uchrashuv komissari va nazoratchisi bo‘lajak bahsning tashkiliy jihatlari yuzasidan barcha zarur ma’lumotlarni taqdim etishdi. Shuningdek, ertangi uchrashuvda jamoalar qanday rangdagi liboslarda maydonga chiqishi ham aniqlab olindi. Unga ko‘ra, mezbonlar ertaga qizil, “lochinlar” esa oq rangli liboslarda maydonga chiqishadi.
Eslatib o‘tamiz, “Nassaji Mazandaran” – “Navbahor” bellashuvi ertaga Toshkent vaqti bilan soat 19:00 da Tehrondagi “Ozodi” stadionida bo‘lib o‘tadi.
