"Навбаҳор" ПФК делегацияси Осиё Чемпионлар лигаси (ОЧЛ)нинг 4-туридан ўрин олган, сафарда Эроннинг “Нассажи Мазандаран” жамоасига қарши ўтказиладиган учрашувда иштирок этиш учун Тошкент – Шаржа – Теҳрон авиа йўналиши бўйича сафарга чиқиб, Теҳрон вақти билан соат 11:00 да Эрон пойтахтига етиб борди.

Эртага ОФК Чемпионлар лигаси гуруҳ босқичи, 4-тури доирасида "Навбаҳор" сафарда Эроннинг “Нассажи Мазандаран” клубига қарши баҳс олиб боради. Бугун мазкур ўйин олдидан учрашувнинг ташкилий масалаларига бағишланган йиғилиш ўтказилди. Унда ҳар икки иштирокчи жамоалар вакиллари ва бўлажак ўйин масъуллари иштирок этишди.

Йиғилишда эртанги учрашув комиссари ва назоратчиси бўлажак баҳснинг ташкилий жиҳатлари юзасидан барча зарур маълумотларни тақдим этишди. Шунингдек, эртанги учрашувда жамоалар қандай рангдаги либосларда майдонга чиқиши ҳам аниқлаб олинди. Унга кўра, мезбонлар эртага қизил, “лочинлар” эса оқ рангли либосларда майдонга чиқишади.

Эслатиб ўтамиз, “Нассажи Мазандаран” – “Навбаҳор” беллашуви эртага Тошкент вақти билан соат 19:00 да Теҳрондаги “Озоди” стадионида бўлиб ўтади.