Ma’lumki, “Qizilqum”ga qarshi bo‘lib o‘tgan o‘yin “Andijon” jamoasi uchun omadsiz o‘tdi va tabiiyki, bunday natijani hech kim kutmagandi. Ushbu bellashuvda “Burgutlar” sharafini himoya qilgan iqtidorli yarim himoyachi Ilhom Abdug‘aniyev bu borada quyidagicha fikr bildirdi:

“To‘g‘ri aytasiz, “Qizilqum”ga qarshi jamoamizga omad va o‘zimizga bo‘lgan ishonch yetishmadi, deb o‘ylayman. Ha, ko‘pchilik kutmagan natija bo‘ldi. Albatta, biz oldindan uchrashuv og‘ir bo‘lishini bilgandik. Afsuski, murabbiylarimizning ko‘rsatmalarini bajarishda ko‘plab xatoliklarga yo‘l qo‘ydik.  Bundan to‘g‘ri xulosalar chiqaramiz".

Chempionat yakuniga ikkita tur qoldi. Oldinda "Andijon"ni safarda "Turon" va o‘z uyida "Buxoro"ga qarshi bahslar kutmoqda. Ikkala o‘yinni 100 foizli natija bilan yakunlash asosiy masala, deyish mumkin. 10-raqam egasi Abdug‘aniyev chempionat yakunidagi bo‘lajak uchrashuvlar oldidan ham o‘z qarashlarini ifoda etdi.

“Ha, chempionat tugashiga 2 tur qoldi. Jamoamizni oldinda yana ikkita qiyin o‘yin kutyapti. “Turon” hamda “Buxoro” klublari ham bo‘lajak uchrashuvlarda borlarini berib o‘ynaydilar. Ularning maqsadi Superligada qolish. Lekin bizning ham maqsadimiz bu yilgi mavsumni chiroyli va yuqori notada tugatish. Albatta, oxirgi ikkita o‘yinda g‘alaba qozonib muxlislarimizni quvontirish va ularning qarshisida yuzimiz yorug‘ holatda tugatishni istaymiz”.

Mavsum oxirlab qolganini inobatga olsak, jamoada charchoq alomati sezilmayaptimi? Chunki bunday pallada futbolchilarning jismoniy tayyorgarligi asosiy o‘ringa chiqadi...

“Albatta, mavsum oxirida nafaqat bizda, balki boshqa jamoalarda ham charchoq seziladi. Lekin o‘yindan-o‘yingacha to‘g‘ri tayyorlanib, to‘g‘ri tiklanish ishlari olib borilyapti. “Qizilqum” bizdan ko‘ra ko‘proq dam oldi. Balki shuning uchun shunday holat sezilgan bo‘lishi mumkin. Ammo bizda charchoqdan ko‘ra, o‘zimizga bo‘lgan ishonch yetishmadi. Biroq oxirgi uchrashuvlarda bunday bo‘lmaydi va biz albatta ishqibozlarimizni xursand qila olamiz”, - deydi Ilhom.   

Yana bir gap: “Andijon” jamoasining muhim figuralaridan biri Rubin Xebay 12 ta gol bilan to‘purarlar orasida peshqadamlardan biri. Rubin yakunda to‘purarlikni o‘ziniki qila oladimi? Abdug‘aniyevning munosabati shunday bo‘ldi:

“Rubin Xebay hozirda 12 ta gol bilan Superliga to‘purari bo‘lishga asosiy nomzod bo‘lib turibdi. Yakunda ham shunday bo‘ladi, deb o‘ylayman, Xudo xohlasa. Bunga Xebayni bir o‘zi emas, biz ham, barchamiz qo‘limizdan kelganicha yordam beramiz”, - deya fikr bildirdi, Ilhom Abdug‘aniyev.

"Andijon" matbuot xizmati.