Serbiyalik tennischi, jahonning birinchi raqamli raketkasi, «Katta dubulg‘a» turkumiga kiruvchi 24 ta turnir chempioni Novak Jokovich Parijda (Fransiya) «Masters» musobaqasida g‘olib chiqdi.
Final bahsida sportchi ikki setda dunyoning 17-raketkasi bolgariyalik Grigor Dimitrovni ishonchli tarzda mag‘lub etdi. Uchrashuv 6:4, 6:3 hisobida yakunlandi.
Tennischilar kortda 1 soat 38 daqiqa vaqt o‘tkazishdi. Uchrashuv davomida Novak Jokovich oltita eysni bajardi, to‘rtta breyk-pointdan uchtasini aniq amalga oshirdi va bitta qo‘sh xatoga yo‘l qo‘ydi. Grigor Dimitrovda beshta eys va ikkita qo‘sh xato bor.
Novak Jokovich faoliyatidagi 97- va joriy mavsumdagi oltinchi chempionligini qo‘lga kiritdi. Bu chempionlik serbiyalik tennischining «Masters»dagi faoliyatidagi 40-g‘alabasi ham bo‘ldi.
