"Lion" futbol klubi "Marsel" muxlislari jamoa avtobusiga hujum qilgani bo‘yicha tartib-intizom komissiyasining qarori ustidan shikoyat qiladi. Bu haqda klub matbuot xizmati xabar berdi.

Avvalroq Fransiya Professional futbol ligasi (LFP) jamoaning Marseldagi o‘yini oldidan "Lion" avtobusida muxlislar tomonidan uyushtirilgan hujum uchun "Marsel" klubiga nisbatan sanksiyalar qo‘llamaslikka qaror qilgani ma’lum bo‘lgan edi. Uchrashuv boshlanishiga oz vaqt qolganda mezbonlar muxlislari mehmon klub avtobusiga tosh otishdi. Voqea tufayli o‘yin bekor qilindi.

"Lion" bosh murabbiyi Fabio Grosso shisha parchalaridan jiddiy jarohat oldi. Avtobusning o‘ng tomonidagi oyna sinishi oqibatida Grossoning yordamchisi Raffaele Longoning ham ko‘ziga shisha parchalari kirib ketgan. "Lion" tartib-intizom komissiyasining qaroridan qoniqmadi, klub bu qaror ustidan shikoyat qilmoqchi. "Lion" matbuot xizmati ham bu voqea butun jamoa va uning muxlislari uchun jiddiy oqibatlarga olib kelganini eslatdi.