"Лион" футбол клуби "Марсель" мухлислари жамоа автобусига ҳужум қилгани бўйича тартиб-интизом комиссиясининг қарори устидан шикоят қилади. Бу ҳақда клуб матбуот хизмати хабар берди.
Аввалроқ Франция Профессионал футбол лигаси (LFP) жамоанинг Марселдаги ўйини олдидан "Лион" автобусида мухлислар томонидан уюштирилган ҳужум учун "Марсель" клубига нисбатан санкциялар қўлламасликка қарор қилгани маълум бўлган эди. Учрашув бошланишига оз вақт қолганда мезбонлар мухлислари меҳмон клуб автобусига тош отишди. Воқеа туфайли ўйин бекор қилинди.
"Лион" бош мураббийи Фабио Гроссо шиша парчаларидан жиддий жароҳат олди. Автобуснинг ўнг томонидаги ойна синиши оқибатида Гроссонинг ёрдамчиси Раффаэле Лонгонинг ҳам кўзига шиша парчалари кириб кетган. "Лион" тартиб-интизом комиссиясининг қароридан қониқмади, клуб бу қарор устидан шикоят қилмоқчи. "Лион" матбуот хизмати ҳам бу воқеа бутун жамоа ва унинг мухлислари учун жиддий оқибатларга олиб келганини эслатди.
