Пеп Гвардиола 2024 йилнинг декабрь ойида Чемпионлар лигаси доирасидаги «Ювентус»га қарши ўйиндан (0:2) сўнг «Манчестер Сити» футболчиларига хотини билан ажрашиши ҳақида сўзлаб берган.

Ушбу лавҳалар Prime Video платформасида намойиш этилган «A Beautiful Obsession» ҳужжатли фильмида кўрсатилди.

«Йигитлар, сизларга бир нарсани тан олмоқчиман. Мен сайёрангиздаги энг гўзал аёл билан ажрашяпман.

У менинг хотиним, менинг собиқ хотиним. Мен уни жон-дилимдан яхши кўраман, лекин ўртамиздаги эҳтирос сўнди. Кўп сабабларга кўра. Мен уни яхши кўраманми? Ҳа, албатта. У-чи, мени яхши кўрадими? Ҳа. Лекин биз эҳтиросни йўқотдик.

Сизлар футболни қандай ўйнайсизлар? Шунчаки ўйнайсизларми ёки ичингизда нимадир борми? Эҳтирос ўзи нима? Ҳаётингизда нима билан шуғуллансангиз ҳам, буни эҳтирос билан қилинг. Менга шунчаки яхши ўйинчилар керак эмас, менга эҳтироси бор ўйинчилар керак», — деган Гвардиола кийиниш хонасида.