Superliga 19-turi doirasida «Buxoro» maydonidagi g‘alabadan keyin «Olimpik» bosh murabbiyi Timur Kapadze matbuot anjumanida ishtirok etdi.

— Jamoamni g‘alaba bilan tabriklayman. Yigitlarim yaxshi o‘yin ko‘rsatishdi. Penalti bormidi-yo‘qmidi, vaziyatni ko‘rmadim. Lekin umuman olganda, bugungi o‘yinimiz orqali jamoam g‘alabaga loyiq edi deb o‘ylayman. Yaxshi vaziyatlarimiz bo‘ldi, balki ertaroq gol urganimizda barchasi ertaroq tugashi mumkin edi.

 Jamoada barchaning ko‘ziga tashlanib turgan muammolar bor edi. «Buxoro» o‘yinga yaxshi tayyorgarlik ko‘rgani ko‘rindi. Ular birinchi bo‘limda bizga katta tashvishlar keltirib chiqarishdi. «Buxoro»ga omad tilayman, ularning holatini tushunib turibman. Ammo bu futbol.

— «Buxoro»dek jamoaning Superligada bo‘lmasligi chempionatga qanchalik ta’sir o‘tkazadi? Chunki «Buxoro» kabi o‘z stadioni, muxlislarga ega jamoa Superligada kam.
— «Buxoro» Superligada yaxshi o‘ringa ega jamoa, muxlislarini doimo hurmat qilib kelganman. Ular jamoasini sevadi va yaxshi muxlislik qilishadi. Ular bugungi mag‘lubiyat sababli Superligadan tushib ketishmayapti, mavsum davomida ko‘p joylarda ochko ololmagani, kamchiliklar bo‘lgani ta’sirini o‘tkazdi. Buxoroda doimo futbol bo‘ladi, chunki jamoaning jonkuyar muxlislari bor. «Buxoro» doimo muxlisligi bilan maqtana oladi va shu sababli ular Superligada yaxshi jamoa bo‘lib, yuqori o‘rinlarda yurishga haqli. Chunki jamoa muxlislari ham buni kutishadi.

Vaqti keladi, hali «Buxoro» ham chempion bo‘ladi, OCHLda O‘zbekiston sharafini himoya qiladi. Buning uchun yaxshi jamoa, murabbiy va rahbariyat kerak. Klubda ko‘p narsalarni to‘g‘rilash kerak. Chunki ko‘chadan klubdagi sharoitlar, akademiya va boshqa narsalar haqidagi kamchiliklarni eshitamiz. O‘ylaymanki, asta-sekinlik bilan barchasi to‘g‘rilanib, yaxshilanib boriladi.