Ayni holatda qaysi klubni Yevropada eng yaxshisi sifatida tilga olish mumkin?
Natijalar bo‘yicha aytsak, bu maqomga Turkiya Superligasi ishtirokchisi - «Fenerbaxche» munosib edi yaqingacha. Chunonchi, «kanareykalar» joriy mavsum hisobidan dastlabki 19ta o‘yinda mag‘lubiyatga uchrash u yoqda tursin, hatto ochko ham yo‘qotmadilar. To‘g‘ri, 20-qadamga kelganda, Istanbul jamoasining aqlni ozdiradigan zo‘r seriyasi xotima topdi...
G‘alabali seriya. «Fenerbaxche» joriy mavsum ikki turnir hisobidan qatorasiga 19ta o‘yinni o‘z foydasiga hal qildi. Aniqrog‘i, istanbulliklar mahalliy Superligada 10ta, Konferensiyalar Ligasi (saralash bosqichi bilan birga)da esa 9ta g‘alaba qayd etdilar. 4 noyabr kuni esa o‘z maydonlarida «Trabzonspor»ga yutqazib qo‘ydilar - 2:3.
Umumiy natija. Diqqatga sazovor tomoni, g‘olibona yurishi davomida umumiy hisobda 58ta gol urib, 10ta qo‘yib yubordi. Eng qizig‘i, Turkiya Superligasi 11-turidan oldin har ikki turnirdagi umumiy hisob teng edi - 29:5.
Yevropaning eng yaxshi klubi. Yevropaning eng kuchli 10ta ligasining joriy mavsumiga qarasak, boshqa biror jamoa barcha turnirlar doirasidagi o‘yinlarda bunday uzun g‘olibona odimlagani bilan maqtanolmaydi. Mag‘lubiyatsiz seriya bo‘yicha esa ikkinchi yaxshi natija «Bayer»da: 16ta o‘yinda 13ta g‘alaba va 3ta durang.
