Айни ҳолатда қайси клубни Европада энг яхшиси сифатида тилга олиш мумкин?
Натижалар бўйича айтсак, бу мақомга Туркия Суперлигаси иштирокчиси - «Фенербахче» муносиб эди яқингача. Чунончи, «канарейкалар» жорий мавсум ҳисобидан дастлабки 19та ўйинда мағлубиятга учраш у ёқда турсин, ҳатто очко ҳам йўқотмадилар. Тўғри, 20-қадамга келганда, Истанбул жамоасининг ақлни оздирадиган зўр серияси хотима топди...
Ғалабали серия. «Фенербахче» жорий мавсум икки турнир ҳисобидан қаторасига 19та ўйинни ўз фойдасига ҳал қилди. Аниқроғи, истанбулликлар маҳаллий Суперлигада 10та, Конференциялар Лигаси (саралаш босқичи билан бирга)да эса 9та ғалаба қайд этдилар. 4 ноябрь куни эса ўз майдонларида «Трабзонспор»га ютқазиб қўйдилар - 2:3.
Умумий натижа. Диққатга сазовор томони, ғолибона юриши давомида умумий ҳисобда 58та гол уриб, 10та қўйиб юборди. Энг қизиғи, Туркия Суперлигаси 11-туридан олдин ҳар икки турнирдаги умумий ҳисоб тенг эди - 29:5.
Европанинг энг яхши клуби. Европанинг энг кучли 10та лигасининг жорий мавсумига қарасак, бошқа бирор жамоа барча турнирлар доирасидаги ўйинларда бундай узун ғолибона одимлагани билан мақтанолмайди. Мағлубиятсиз серия бўйича эса иккинчи яхши натижа «Байер»да: 16та ўйинда 13та ғалаба ва 3та дуранг.
