Dortmundning "Borussiya" Bundesliga doirasida safarda "Shtutgart"ga qarshi o‘yinda mag‘lubiyat alamini totib ko‘rdi.
O‘yinning dastlabki daqiqalarida darvozabon Gregor Kobel tomonidan qo‘pollik ishlatgani uchun "arilar" darvozasiga penalti belgilandi. "Borussiya" darvozaboni "Shtutgart" futbolchisi Kris Fyurixning o‘n bir metrlardan yo‘llagan zarbasini qaytarib, xatosini to‘g‘irladi.
Opta portali xabariga ko‘ra, Kobel 10 yil ichida Bundesliga o‘yinida penaltini qaytargan birinchi "Borussiya" darvozaboni bo‘ldi. Buni oxirgi marta 2013 yilning oktyabr oyida Roman Vaydenfeller amalga oshirgandi.
Ushbu seyvlar orasidagi intervallarda “Borussiya” darvozasiga 37 ta penalti belgilandi: 36 tasi golga aylantirilgan, yana bir vaziyatda esa to‘p noaniq ketgan.
