Sobiq futbolchi Nil Uornok Premyer-ligada VARlarni ko‘rish juda uzoq davom etayotganidan norozi.

Xususan, Uornok chempionatning 11-turidan o‘rin olgan «Tottenxem» – «Chelsi» uchrashuvida (1:4) uzoq davom etgan pauzalarni qayd etdi.

«Bizning liga uzoq vaqtdan beri dunyoning eng yaxshisi bo‘lib kelgan. Ammo «Tottenxem» - «Chelsi» uchrashuvini tomosha qilgan har bir kishi bemalol VAR ko‘rilayotganda oshxonaga borishi, choynakni qo‘yishi va kechki ovqatni yeb olishi yoki chekish uchun tashqariga chiqishi mumkin edi. Bu kulgili.

Ehtimol, vaqt chegarasi bo‘lishi kerak. Men har doim aytganman: «Agar xatoni 30 soniyada ko‘ra olmasangiz, hakamning dastlabki qaroriga amal qiling.

Ba’zan bir necha daqiqa o‘tadi - bu shunchaki kulgili. Qaror qabul qilishni tezlashtirish uchun sun’iy intellekt texnologiyasidan foydalanishga to‘g‘ri keladi», — dedi Uornok.