Madridning “Real” klubi hujumchi Vinisius Junior va yarim himoyachi Eduardo Kamavinga terma jamoalar safida jarohat olganidan norozi, deya xabar bermoqda Marca.
Manbaning qayd etishicha, Madrid klubi buning uchun La Liga, Ispaniya futbol federasiyasi, FIFA va UEFA rahbariyatini ayblamoqda. "Real Madrid" vakillari futbolchilarning jarohatlanishiga ortiqcha tig‘iz taqvim sabab deb hisoblamoqda.
Vinisius Braziliya terma jamoasi safida JCH-2026 saralashida Kolumbiya bilan o‘yinda (1:2) son suyagidan jarohat oldi. Xabar qilinishicha, vinger taxminan 2,5 oyni o‘tkazib yuboradi va 2024 yilning fevraligacha qaytmaydi. 23 yoshli futbolchi joriy mavsumda “Real” safida 13 ta o‘yin o‘tkazib, 6 ta gol urdi va 4 ta golli uzatmani amalga oshirdi.
Kamavinga 16 noyabr kuni Fransiya terma jamoasini tark etdi. Avvalroq, terma jamoa bilan mashg‘ulot vaqtida "PSJ" hujumchisi Usmon Dembele bilan to‘qnashuvdan so‘ng futbolchi tizzasidan jarohat olgandi. 21 yoshli yarim himoyachi joriy mavsumda "Real"ning 17 ta uchrashuvida ishtirok etdi va 1 ta golli uzatmani amalga oshirdi.
