Мадриднинг “Реал” клуби ҳужумчи Винисиус Жуниор ва ярим ҳимоячи Эдуардо Камавинга терма жамоалар сафида жароҳат олганидан норози, дея хабар бермоқда Marca.
Манбанинг қайд этишича, Мадрид клуби бунинг учун Ла Лига, Испания футбол федерацияси, ФИФА ва УЕФА раҳбариятини айбламоқда. "Реал Мадрид" вакиллари футболчиларнинг жароҳатланишига ортиқча тиғиз тақвим сабаб деб ҳисобламоқда.
Винисиус Бразилия терма жамоаси сафида ЖЧ-2026 саралашида Колумбия билан ўйинда (1:2) сон суягидан жароҳат олди. Хабар қилинишича, вингер тахминан 2,5 ойни ўтказиб юборади ва 2024 йилнинг февралигача қайтмайди. 23 ёшли футболчи жорий мавсумда “Реал” сафида 13 та ўйин ўтказиб, 6 та гол урди ва 4 та голли узатмани амалга оширди.
Камавинга 16 ноябрь куни Франция терма жамоасини тарк этди. Аввалроқ, терма жамоа билан машғулот вақтида "ПСЖ" ҳужумчиси Усмон Дембеле билан тўқнашувдан сўнг футболчи тиззасидан жароҳат олганди. 21 ёшли ярим ҳимоячи жорий мавсумда "Реал"нинг 17 та учрашувида иштирок этди ва 1 та голли узатмани амалга оширди.
