Xabaringiz bor, kelasi yili O‘zbekiston arenalari futzal bo‘yicha FIFA Jahon chempionatiga mezbonlik qiladi.

Ayni paytda O‘FA va FIFA vakillari musobaqa tashkiliy qo‘mitasini shakllantirib, futzal bo‘yicha mundialga hozirlik ishlarini boshlab yuborgan.

Musobaqalarni o‘tkazish bo‘yicha tashkilotchilik tajribasi bilan yaqindan tanishtirish maqsadida FIFA vakillari O‘FA mutaxassislarini hozirda Indoneziyada bo‘lib o‘tayotgan U-17 Jahon chempionatiga taklif etdi.

O‘FA ishchi guruhi U-17 JCH o‘tkazilayotgan shaharlarda bo‘lib, FIFAning musobaqa uchun qarorgohi ish faoliyati bilan yaqindan tanishdi. Mundialning tashkiliy masalalari, jumladan stadionlarda amalga oshirilgan tayyorgarlik jarayoni, muxlislar uchun yaratilgan shart-sharoitlar, ishtirokchi jamoalarga taqdim etiladigan qulayliklar, stadionlar va mezbon shaharlar bo‘ylab amalga oshirilgan targ‘ibot ishlari, turnir vaqtida shaharlararo transportni yo‘lga qo‘yish, marketing va media tadbirlarini o‘tkazish, uchrashuvlarni butun dunyoga efirga uzatadigan translyatsiya markazi faoliyati o‘rganildi.

FIFA mutaxassislari bilan ko‘ngillilar (volontoyorlar) dasturini yo‘lga qo‘yish, qolaversa musobaqa uchrashuvlarini o‘tkazishdagi yuzaga kelishi mumkin bo‘lgan turli jihatlar yuzasidan fikr almashildi.

Mahalliy tashkiliy qo‘mita a’zolarining malakasini oshirish, FIFA va Indoneziya futbol assotsiatsiyasi vakillari bilan tajriba almashish maqsadida tashkil qilingan ushbu safar FIFA bilan birgalikda amalga oshirilayotgan ko‘plab loyihalardan biridir.

Shuningdek, O’FA mutaxassislari bugun bo’lib o’tadigan O’zbekiston - Angliya o’smirlar terma jamoalari o’rtasidagi chorak final bahsini tashkil etishda FIFA mas’ullariga ko’maklashadi.