"Korintians" yarim himoyachisi Gabriel Moskardo "Barselona"ning transfer maqsadi bo‘lib qolmoqda.
Kataloniya klubi 18 yoshli futbolchini tayanch yarim himoyachi pozisiyasiga eng qiziqarli nomzodlardan biri deb hisoblamoqda, biroq avval xabar qilinganidek, "ko‘k anorranglilar"ning moliyaviy qiyinchiliklari kelishuvga to‘sqinlik qilishi mumkin. "Sport" nashrining yangilangan ma’lumotlariga ko‘ra, barcha muammolarga qaramay, sport direktori Deku bir necha hafta davomida Moskardoning atrofidagilar bilan aloqada bo‘lib kelgan. La Liga grandi hali ham "PSJ" tomonidan da’vogarlik qilayotgan yosh braziliyalik uchun kurashni davom ettirmoqda.
"Transfermarkt" portali Gabriel Moskardoning narxini 1,5 million yevroga baholamoqda.
