"Paxtakor" bosh murabbiyi Maksim Shaskix Osiyo chempionlar ligasi guruh bosqichi 6-turi doirasida bo‘lib o‘tadigan Saudiya Arabistonining “Al-Fayha” klubiga qarshi bahs oldidan matbuot anjumanida ishtirok etdi.

Maksim Shaskix: — Ertaga mavsumdagi oxirgi o‘yinni o‘tkazamiz. Yaxshi futbol ko‘rsatishga intilamiz. Og‘ir o‘tgan mavsum yakunida ta’tilga yaxshi kayfiyatda chiqib ketish uchun g‘alaba qozonishga harakat qilamiz. Muxlislarni xursand etishga urinamiz. Vaziyat qo‘limizda emas, lekin yutuqqa erishishga intilamiz. Raqibning qanday tarkibda kelganini bilamiz, lekin Chempionlar Ligasi va ichki musobaqalar o‘rtasida farq bor. Jamoalar tarkibi teng holatda deb o‘ylayman.

Dastlabki o‘yinlarda bizga vaziyatlardan foydalanish yetishmadi. O‘zimiz xatolar qildik. Bundan tegishli xulosalar chiqaramiz. Kelasi yil yanada kuchliroq raqiblarga qarshi maydonga tushamiz.

Muxlislarning qo‘llab-quvvatlashi biz uchun juda muhim. Ertaga barchani stadionda kutib qolamiz.

Po‘latxo‘ja Xoldorxonov: - Hammaga salom. Bizda hali imkoniyat bor, undan foydalanishga urinib ko‘ramiz. Ertaga g‘alaba qozonish uchun borimizni beramiz. Jamoada kayfiyat juda yaxshi holatda.

Dastlabki bahslardagi mag‘lubiyat qimmatga tushdi. Ularda ochko qo‘lga kiritganimizda hozir vaziyat nazoratimiz ostida bo‘lishi mumkin edi. Lekin hali imkoniyat bor.