Kuni kecha insayderlar "Manchester Yunayted" himoyachisi Garri Maguayr Angliya chempionatining noyabr oyidagi eng yaxshi futbolchisi uchun ovoz berishda g‘alaba qozonganini xabar qilishdi. Premyer-liga matbuot xizmati Maguayrning eng yaxshi deb topilganini rasman e’lon qildi.
O‘tgan oy Garri Maguayr Angliya chempionatining uchta o‘yinida qatnashib, har birida 90 daqiqadan o‘ynadi. “Manchester Yunayted” ularning birortasida ham gol o‘tkazib yubormadi – “Fulxem” (1:0), “Luton Taun” (1:0) va “Everton” (3:0) ustidan g‘alaba qozonildi.
"Manchester Yunayted" ayni damda APL turnir jadvalida 6-o‘rinni egallab turibdi. Erik ten Xag shogirdlari navbatdagi o‘yinni 9 dekabr kuni "Bornmut"ga qarshi o‘tkazadi.
