Mana, «A» seriya qisqa tanaffusdan keyin yana Yevropaning eng kuchli ligalari qatorida zikr etilmoqda. Hozirda Italiya chempionati o‘yinlari muxlislarni ohanrabodek tortmoqda o‘ziga. Lekin gap faqat ajoyib futbol to‘qnashuvlari emas, balki tribunalardagi go‘zallik haqida ham. Demak, quyidagi fotojamlanma bilan italiyalik ayrim futbolchilarning eng asosiy hurliqo muxlislari bilan birrov tanishib chiqamiz.
Kyara NASTI. Sohibjamol Kyara 25 yoshda, vaqtida Armani modeli sifatida faoliyat yuritgan. Ijtimoiy tarmoqlarda 2 million obunachisi bor, demak, taniqli inflyuyenser (ijtimoiy ta’siri kuchli media). Nasti «Lasio» vakili Mattia Zakkani bilan unashtirilgan, 2022 yili esa juftlik o‘g‘ilchali bo‘ldi (ismi - Tyago). Kyara bunga qadar Mattianing Italiya milliy termasidagi jamoadoshi Nikolo Zanyolo bilan ham ma’lum muddat uchrashgan. Hattoki, Neymar ham sohibjamol ayolni o‘ziga jalb qilishga uringan, ammo harakati samara bermagandi.
Lyusi BRAMANI. Italiyalik futbol fanatlari 23 yoshli modelni dunyodagi eng go‘zal ayollardan biri sifatida maqtashadi. Federiko Kyezaning qallig‘i futbol muxlisasi emasligini tan olgan. Lyusi ijtimoiy platformada 150 mingdan ortiq obunachiga ega. Model o‘z sahifasida shov-shuvli turmush tarzi haqida ko‘p yozadi. Aytish joiz, u Milan universitetida tahsil olgan va diplomli ruhshunosdir.
Kamilla BRESHIANI. Italiya milliy jamoasi va «Inter» klubi himoyachisi Alessandro Bastonining rafiqasi. Ikkisining to‘yi o‘tgan yili Bergamoda bo‘ldi. Ayni payt Alessandro va Kamilla qiz farzandlarini tarbiyalashmoqda.
Tessa LAKOVICH. 2022 yili «Yuventus» yarim himoyachisi Manuel Lokatelli bilan oila qurgan Kosta-rikalik 25 yoshli hurliqo. Er-xotin allaqachon o‘g‘ilchali bo‘ldi. Tessa raqamli kommunikasiya bo‘yicha magistr darajasiga ega, shuningdek, Madam zargarlik brendi sohibasi sanaladi.
Karolina STRAMARE. 23 yoshli italiyalik o‘tgan yilning yanvar oyidan buyon «Yuve» hujumchisi Dushan Vlaxovich bilan birga. Uning 2019 yili «Italiya go‘zali» tanlovida g‘olib chiqqanida hayratlanarli tomoni yo‘q - Karolinada aql va husn mujassam.
D.Alimov tayyorladi
