Xabi Alonso boshqaruvidagi «Bayer»ning Bundesligadagi yurishi o‘z yo‘liga.

Har holda, Leverkuzen klubi tarkib nuqtai nazaridan ham chakki emas. Lekin kamtarin «Jirona»ning Ispaniyada dahshatli «Real» bilan tengma-teng ketayotgani ko‘pchilik miyasini charxlayapti, baribir. Shuning barobarida statistikaga qarasak, Kataloniya klubining yurishi tasodifga o‘xshamayapti.

Michel jamoasi yurishida bir qator jiddiy argumentlar bor: Deyli Blind va Erik Garsiyadan iborat markaziy himoyachilar tandemining tartibli harakatiyu, birinchi uzatma bobida ajralib turgani, maydon markazida nazorat o‘rnatilgani (bosh rollarda Aleysh Garsiya va «Manchester Siti» maktabidan o‘tgan Anxel Errera), shuningdek, uslub borasida aql bovar qilmas xilma-xillik («Jirona» joriy mavsum naq 8ta taktik chizmadan foydalanishga ulgurdi, lekin ulardan hech birini 500 daqiqadan ko‘p qo‘llamadi). Oddiy aytganda, raqiblar Michel jamoasining kuchli jihatlarini oldindan biladi, ammo uning qanday yurish qilishini anglolmaydi.

Demak, «Jirona»ning bugungi asosiy siri - bosh murabbiy Michel tomonidan yo‘lga qo‘yilgan uslublar. Yana skautlar xizmatini ham e’tirof etish kerak. Jamoa asosan istiqboli futbolchilarni xarid qildi va ularning o‘z tizimiga moslashishlariga zarur sharoit yaratdi. Misol uchun, ukrainalik Viktor Sigankov va Artyom Dovbik qisqa vaqtda jiddiy klublar e’tiboriga tushishdi. Yana braziliyalik yosh iqtidor Savioni unutmaslik kerak. Ehtimolki, «Jirona»ning City Football Group konserni tarkibida ekanligi ham o‘z so‘zini aytayotgandir. Zero, guruh tarkibidagi klublar futbolchi almashtirish asnosida bir biriga yaqindan ko‘maklashadi. Oddiy aytganda, «Jirona»da qiziqarli futbolchilarni sotib olish yoki ijara kelishuvi asosida o‘ynatish imkoniyati kengroq.