Osiyo futbol konfederasiyasi 14 dekabr kuni futzal bo‘yicha terma jamoalari o‘rtasidagi Osiyo chempionatining final bosqichiga qur’a tashlash marosimini o‘tkazadi.

17 marta bo‘lib o‘tadigan qit’a chempionatiga Tailand mezbonlik qiladi. Musobaqa 2024 yilning 17-28 aprel kunlari oralig‘ida bo‘lib o‘tadi.

Qur’ada O‘zbekiston 1-savatda bo‘ladi. Bu savatda, shuningdek, Tailand, Yaponiya va Eron terma jamoalari ham o‘rin olishgan.

1-savat: Tailand, Yaponiya, Eron, O‘zbekiston

2-savat: Tojikiston, Kuvayt, Vyetnam, Saudiya Arabistoni

3-savat: Iroq, Bahrayn, Janubiy Koreya, Myanma

4-savat: Afg‘oniston, Qirg‘iziston, Avstraliya, Xitoy.

Musobaqada dastlabki 4 ta o‘rinni egallagan terma jamoalar 2024 yilning kuzida O‘zbekistonda o‘tkaziladigan jahon chempionati yo‘llanmasini qo‘lga kiritadi. Agar O‘zbekiston Osiyo chempionatida yarim finalgacha yetib borsa, yana bir yo‘llanma egasi qo‘shimcha pley-off bahslari yordamida aniqlanadi.