Futbolchi Kayo Enrike de Lima Braziliyadagi o‘yin vaqtida chaqmoq urishi oqibatida vafot etdi. Sportchi 21 yoshda edi, yana olti nafar futbolchi jarohat olgan, deb xabar berdi Braziliyaning Globo nashri.
"21 yoshli Kayo Enrike de Lima Gonsalves ismli futbolchi Santo Antoniodagi "Platinada" stadionda futbol o‘yini chog‘ida chaqmoq urishi oqibatida vafot etdi”, — deyiladi materialda.
Futbolchi "Uniau Japirense" havaskorlar jamoasida o‘ynagan. Parana shtatida mintaqaviy havaskorlar kubogi musobaqasi vaqtida yomg‘ir yog‘di. O‘yin davomida chaqmoq chaqdi. Hodisa oqibatida o‘sha paytda maydonda bo‘lgan yana olti nafar futbolchi jarohat oldi. Futbolchilar kasalxonaga yotqizilgan.
Hozirda jarohat olgan besh futbolchi shifoxonada shifokorlar nazoratida qolmoqda. Yana bir sportchi esa og‘irroq ahvolda kasalxonaga yotqizilgan. Qayd etilishicha, barcha jabrlanganlarning tanasi kuygan.
Mahalliy yong‘in xavfsizligi xizmati ma’lumotlariga ko‘ra, yilning shu davrida iqlimning beqarorligi tufayli momaqaldiroq va chaqmoq urishi ehtimoli juda yuqori.
