Surxondaryo viloyatining chekka va olis qishloqlaridagi iqtidorli yoshlarni aniqlash, futbol orqali ularning individual qobiliyatlarini ro‘yobga chiqarish maqsadida surxondaryolik taniqli futbolchi Eldor Shomurodov futbol akademiyasini tashkil etish rejalashtirilgan.
Bugun viloyat hokimi Ulug‘bek Qosimov Termiz tumanida joylashgan Futbol akademiyasi negizida Eldor Shomurodov futbol akademiyasini qurish bo‘yicha ishlab chiqilgan loyiha bilan tanishdi, deyiladi viloyat hokimligi matbuot xizmati xabarida.
Qurilish ishlari 2024 yil yanvar oyidan boshlanishi rejalashtirilgan bo‘lib, 154 o‘rinli akademiya loyihasida yopiq va ochiq stadionlar, yotoqxona, oshxona hamda boshqa yordamchi binolar bo‘lishi ko‘zda tutilgan.
Viloyat hokimi Yaponiyaga tashrifida "Vanfore Kofu" futbol klubi bilan Surxondaryo viloyatida futbol maktablarini rivojlantirish, akademiyalarda o‘qishni tashkil qilish, o‘yinchilar va trenerlar almashinuvini yo‘lga qo‘yish bo‘yicha kelishuvlarga erishilgan edi, deya qo‘shimcha qilingan.
