Сурхондарё вилоятининг чекка ва олис қишлоқларидаги иқтидорли ёшларни аниқлаш, футбол орқали уларнинг индивидуал қобилиятларини рўёбга чиқариш мақсадида сурхондарёлик таниқли футболчи Элдор Шомуродов футбол академиясини ташкил этиш режалаштирилган.

Бугун вилоят ҳокими Улуғбек Қосимов Термиз туманида жойлашган Футбол академияси негизида Элдор Шомуродов футбол академиясини қуриш бўйича ишлаб чиқилган лойиҳа билан танишди, дейилади вилоят ҳокимлиги матбуот хизмати хабарида.

Қурилиш ишлари 2024 йил январ ойидан бошланиши режалаштирилган бўлиб, 154 ўринли академия лойиҳасида ёпиқ ва очиқ стадионлар, ётоқхона, ошхона ҳамда бошқа ёрдамчи бинолар бўлиши кўзда тутилган.

Вилоят ҳокими Японияга ташрифида "Ванфоре Кофу" футбол клуби билан Сурхондарё вилоятида футбол мактабларини ривожлантириш, академияларда ўқишни ташкил қилиш, ўйинчилар ва тренерлар алмашинувини йўлга қўйиш бўйича келишувларга эришилган эди, дея қўшимча қилинган.