“Palmeyras” klubining 17 yoshli braziliyalik hujumchisi Endrik o‘zining bo‘lajak klubi bilan tanishish uchun ilk bor Madridga uchib keldi. Futbolchining "Real"ga rasmiy transferi 2024 yilning yozida amalga oshadi.
Klub qarorgohiga tashrif buyurishdan tashqari, Endrik "Real"ning "Santyago Bernabeu"dagi "Vilyarreal" bilan uy uchrashuviga tashrif buyuradi, shuningdek, "Qirollik klubi" prezidenti Florentino Peres bilan ham uchrashadi, deya xabar bermoqda jurnalist Fabrisio Romano.
Endrik va "Real Madrid" o‘rtasidagi shartnoma 2022 yilning dekabrida, futbolchi 16 yoshda bo‘lganida imzolangan. Braziliya qonunchiligiga ko‘ra, u 2024 yilning iyul oyida, ya’ni 18 yoshga to‘lganda, ispan klubida o‘ynash uchun xorijga ko‘chib o‘tishi mumkin bo‘ladi.
O‘tgan 2023 yilgi mavsumda yosh forvard "Palmeyras"ning asosiy jamoasi safida barcha turnirlarda 40 ta o‘yin o‘tkazib, 12 ta gol urgan.
