2024 yilning 19 yanvar – 1 fevral kunlari Janubiy Koreyaning Kanvon shahrida IV qishki o‘smirlar Olimpiadasi bo‘lib o‘tadi. Dunyoning 80 mamlakatidan 1900 nafar atlet ishtirokida o‘tishi kutilayotgan ushbu musobaqada O‘zbekiston delegasiyasi ham qatnashadi.

Bu galgi qishki Olimpiadada ikki nafar hamyurtimiz (1 yigit va 1 qiz) tog‘ chang‘isi bahslarida yurtimiz sharafini himoya qiladi. Mavsum avvalida Avstriya va Italiyada o‘tgan lisenzion musobaqalarda 3 nafar sportchimiz Samandar Asanov, Rauan Raimqulov hamda Sabina Rejepova kerakli reyting ochkolarini jamg‘arishga muvaffaq bo‘lishdi. Ushbu sport turida O‘zbekiston terma jamoasi uchun 1+1 ko‘rinishida kvota berilgani bois, murabbiylar shtabi R.Raimqulov va S.Rejepovani musobaqa uchun tanlab oldi. Samandar Asanov esa Raimqulovga zaxira sifatida birga shug‘ullanishda davom etmoqda.

Rejaga ko‘ra, bugun tunda hamyurtlarimiz Janubiy Koreyaga yo‘l olishadi. Sportchilarimiz Koreya tomonidan taqdim etilgan “2018 yilgi Olimpiya o‘yinlarining vorislari fondi” loyihasi asosida musobaqa boshlanguncha mashg‘ulot olib boradilar.