"Chelsi" vingeri Mixail Mudrik Angliya chempionatining 19-turidan o‘rin olgan "Kristal Pelas"ga qarshi o‘yinda (2:1) jarohat oldi, deb xabar beradi Tribuna.com sayti.
Uchrashuvning 70-daqiqasida “Pelas” himoyachisi Nataniel Klayn 22 yoshli ukrainalik futbolchiga orqadan zarba berdi, shundan so‘ng Mudrik og‘riq sezdi va bir daqiqadan so‘ng almashtirildi. Uning o‘rniga Armando Broya maydonga tushdi.
Bu futbolchining joriy mavsumdagi uchinchi jarohati. Bungacha Mudrik jarohati sabab “Luton Taun” (3:0) va “Brentford” (0:2) bilan o‘yinni o‘tkazib yuborgandi.
Joriy mavsumda Mudrik 19 ta o‘yin o‘tkazib, 4 ta gol urdi va 2 ta golli uzatmani amalga oshirdi.
