"Inter" bosh murabbiyi Simone Indzagi jamoasining mavsumning birinchi yarmidagi o‘yini haqida o‘z fikrlari bilan o‘rtoqlashdi. "Neradzurrilar" 19-turda “Verona”ga qarshi o‘yinda g‘alabani deyarli qo‘ldan chiqarayotgandi, ammo Davide Frattezining 93-daqiqada kiritgan goli evaziga uch ochkoni tortib olishga muvaffaq bo‘ldi (2:1).
Indzagi shogirdlari hamon turnir jadvalida peshqadamlik qilmoqda va bitta zaxira o‘yini bor bo‘lgan “Yuventus”dan 5 ochko oldinda ketyapti.
“Ushbu o‘yinda juda ko‘p azob chekdik, ammo bunday g‘alabalar juda muhim. "Verona" yaxshi edi. Birinchi davrani 48 ochko bilan yakunladik - bu juda yaxshi natija.
Ammo "Yuventus" ham ajoyib sur’atda ketmoqda, "Milan" va boshqa jamoalar xatoga yo‘l qo‘ysa, musobaqa yanada qiziydi", - dedi Indzagi.