Bugun bo‘lib o‘tgan O‘zbekiston va Falastin terma jamoalari o‘rtasidagi nazorat uchrashuvini stadionda tomosha qilgan Alisher Nikimbayev o‘z fikrlari bilan o‘rtoqlashdi.

"Umuman olganda, O‘zbekiston g‘alaba uchun o‘ynadi. Jamoamiz o‘yinning aksariyat qismida ustunlikka erishdi. Srechko Katanes birdaniga bir necha o‘yinchilarni almashtirgach, Falastin ma’lum vaqt ustunlik qildi. Bu vaqtda futbolchilar o‘zaro bog‘lamlarni yo‘lga qo‘yishga ulgurmagani uchun shunday bo‘ldi. Bu vaqt oralig‘ida falastinliklar ikki vaziyat yaratdi. Ularda birida to‘p dastlab to‘singa tegib, so‘ngra darvoza chizig‘i ustiga tushdi.

O‘yin so‘ngida gol urdik va penaltidan foydalana olmadik. Bulardan tashqari O‘zbekiston terma jamoasida yana bir vaziyat bo‘ldi.

Katanesning ta’bini xira qilgan yagona narsa — o‘yinchilarimizdan biri jarohat olgani bo‘ldi. Ko‘p ehtimol bilan u Osiyo kubogining dastlabki uchrashuvini o‘tkazib yuboradi. Umuman olganda, uning turnirda ishtirok etishi so‘roq ostida qoldi. Men uning ismini ataylab yozmayapman. Bu huquqni terma jamoa matbuot xizmatiga qoldiraman", — deya yozdi "Futbolium" telegram kanali.