"PSJ" prezidenti Nosir Al-Xelayfi italiyalik yarim himoyachi Marko Verrattining Qatarning "Al-Arabi" klubiga o‘tishi haqida fikr bildirdi.

"Men uchun Marko "PSJ"dagi eng yaxshi futbolchilardan biri edi. Bu, ehtimol, biz qilgan eng yaxshi investisiyalardan biri edi. Adashmasam 11 million yevroga sotib oldik. U o‘n bir yil davomida klubning yuqori saviyasida barqaror o‘ynadi. U har mavsumda eng yaxshi futbolchilardan biri edi.

Ammo murabbiyning yangi falsafasi, yangi strategiyasi bor edi. Murabbiyga va’da berdimki, qachon tanlasa, men uning tarafida bo‘laman, g‘oyalarini qo‘llab-quvvatlayman, xohlaganini beraman. Biz shunday qildik. Marko "PSJ" afsonasi bo‘lib qolmoqda", - dedi Al-Xelayfi Le Parisien bilan suhbatda.

Eslatib o‘tamiz, 31 yoshli futbolchi 2012 yildan buyon "PSJ"da o‘ynab keldi. Parijliklar tarkibida italiyalik yarim himoyachi 416 ta o‘yin o‘tkazib, 11 ta gol urdi va 61 ta golli uzatmani amalga oshirdi. Bu vaqt ichida Verratti klub bilan to‘qqizta Liga 1, oltita Fransiya kubogi va oltita Fransiya Ligasi kubogini qo‘lga kiritdi.

Joriy mavsumda italiyalik yarim himoyachi “Al-Arabi” safida 8 ta o‘yin o‘tkazib, 4 ta golli uzatmani amalga oshirdi.