"ПСЖ" президенти Носир Ал-Хелайфи италиялик ярим ҳимоячи Марко Верраттининг Қатарнинг "Ал-Араби" клубига ўтиши ҳақида фикр билдирди.

"Мен учун Марко "ПСЖ"даги энг яхши футболчилардан бири эди. Бу, эҳтимол, биз қилган энг яхши инвестициялардан бири эди. Адашмасам 11 миллион еврога сотиб олдик. У ўн бир йил давомида клубнинг юқори савиясида барқарор ўйнади. У ҳар мавсумда энг яхши футболчилардан бири эди.

Аммо мураббийнинг янги фалсафаси, янги стратегияси бор эди. Мураббийга ваъда бердимки, қачон танласа, мен унинг тарафида бўламан, ғояларини қўллаб-қувватлайман, хоҳлаганини бераман. Биз шундай қилдик. Марко "ПСЖ" афсонаси бўлиб қолмоқда", - деди Ал-Хелайфи Le Parisien билан суҳбатда.

Эслатиб ўтамиз, 31 ёшли футболчи 2012 йилдан буён "ПСЖ"да ўйнаб келди. Парижликлар таркибида италиялик ярим ҳимоячи 416 та ўйин ўтказиб, 11 та гол урди ва 61 та голли узатмани амалга оширди. Бу вақт ичида Верратти клуб билан тўққизта Лига 1, олтита Франция кубоги ва олтита Франция Лигаси кубогини қўлга киритди.

Жорий мавсумда италиялик ярим ҳимоячи “Ал-Араби” сафида 8 та ўйин ўтказиб, 4 та голли узатмани амалга оширди.