Futzal bo‘yicha U-20 terma jamoamiz Portugaliyadagi yig‘in doirasida mezbonlarga qarshi ikkinchi o‘rtoqlik uchrashuvida ishtirok etdi. Tengma-teng kechgan bu galgi bahsda mezbonlarning qo‘li baland keldi.

To‘rtta gol urilgan birinchi bo‘limdan so‘ng hisob teng edi — 2:2. Ikkinchi bo‘lim tugashiga 5 daqiqa qolganida futzalchimiz raqib posboni bilan yakkama-yakka vaziyatga chiqib, imkoniyatdan foydalana olmadi. Oradan bir daqiqa o‘tib esa portugaliyalik oldinga chiqib olishdi.

Uchrashuv so‘ngida bosh murabbiyimiz Shuhrat Tojiboyev o‘ynovchi-darvozabon taktikasini ishga soldi. Jamoamiz yaxshi imkoniyatlarga ega bo‘lib, ulardan foydalana olmadi. Bahs tugashiga bir necha soniya qolganida esa Portugaliya posboni bo‘sh darvozamizga to‘pni yo‘llab, hisobni 4:2 ko‘rinishga keltirdi.

Eslatib o‘tamiz, bir kun avval o‘tkazilgan ilk o‘yinda 3:3 hisobi qayd etilgandi.

Xalqaro o‘rtoqlik uchrashuvi
Portugaliya U20 - O‘zbekiston U20 - 4:2 (2:2)
Gollar: Leonildo Injai (5), Afonso Mourina (17), Eduardo Tchuda (36), Francisko Enrikes (40) — Asilbek Vafoyev (4), Amin Sviridov (19).