Футзал бўйича U-20 терма жамоамиз Португалиядаги йиғин доирасида мезбонларга қарши иккинчи ўртоқлик учрашувида иштирок этди. Тенгма-тенг кечган бу галги баҳсда мезбонларнинг қўли баланд келди.

Тўртта гол урилган биринчи бўлимдан сўнг ҳисоб тенг эди — 2:2. Иккинчи бўлим тугашига 5 дақиқа қолганида футзалчимиз рақиб посбони билан яккама-якка вазиятга чиқиб, имкониятдан фойдалана олмади. Орадан бир дақиқа ўтиб эса португалиялик олдинга чиқиб олишди.

Учрашув сўнгида бош мураббийимиз Шуҳрат Тожибоев ўйновчи-дарвозабон тактикасини ишга солди. Жамоамиз яхши имкониятларга эга бўлиб, улардан фойдалана олмади. Баҳс тугашига бир неча сония қолганида эса Португалия посбони бўш дарвозамизга тўпни йўллаб, ҳисобни 4:2 кўринишга келтирди.

Эслатиб ўтамиз, бир кун аввал ўтказилган илк ўйинда 3:3 ҳисоби қайд этилганди.

Халқаро ўртоқлик учрашуви
Португалия U20 - Ўзбекистон U20 - 4:2 (2:2)
Голлар: Леонилдо Инжаи (5), Афонсо Моуриньа (17), Эдуардо Тчуда (36), Франcиско Энрикес (40) — Асилбек Вафоев (4), Амин Свиридов (19).