Osiyo kubogining "B" guruhidan o‘rin olgan O‘zbekiston va Suriya terma jamoalari o‘rtasidagi uchrashuv yakuniga yetdi.

O‘zbekistonni yaxshi bilgan Ektor Kuper birinchi bo‘lim davomida yaxshi mudofaa qo‘rg‘onini yuzaga keltirdi. Katanesning ayrim rejalari esa ish bermadi. Jumladan, O‘runovning hujum markazida o‘ynashi samarasiz.

Ikkinchi bo‘lim boshida Fayzullayevning maydonga tushishi O‘zbekiston o‘yiniga biroz rang-baranglik qo‘shdi. Taym avvalida Shukurov qulay vaziyatdan darvozaga aniq zarba yo‘llay olmadi.

To‘p Abbosga borganida hujumlarimiz keskin tus ola boshladi. SSKA futbolchisi yo jamoadoshlarini qulay vaziyatga chiqara boshladi , yoki o‘z zarbalar berish payida bo‘ldi. Aniq yo‘llangan bir zarba natijasida Suriya posboni to‘pni qiyinchilik bilan maydondan tashqariga chiqarib yubordi.

83-daqiqada esa suriyaliklar kam sonli hujumlarning birini golga aylantirishdi. Hujumchi ofsayd holatida bo‘lgani uchun gol inobatga olinmadi.

O‘yin so‘ngida Sergeev bosh bilan aniq zarba berdi, biroq uni qaytarish raqib posboniga qiyinchilik tug‘dirmadi.

Shu tariqa, O‘zbekiston Osiyo kubogini durang bilan boshladi. Jamoamiz 18 yanvar kuni Hindistonga qarshi maydonga chiqadi.

Osiyo kubogining "B" guruhi, 1-tur
O‘ZBEKISTON - SURIYA - 0:0
O‘zbekiston: O‘tkir Yusupov, Hojiakbar Alijonov (Sherzod Nasrullayev 46), Rustam Ashurmatov, Umar Eshmurodov, Abduqodir Husanov, Farruh Sayfiyev, Odiljon Hamrobekov, Otabek Shukurov, Hojimat Erkinov (Abbos Fayzullayev 46), Oston O‘runov (Aziz Turg‘unboyev 90), Jaloliddin Masharipov (Igor Sergeev 73)
Suriya: Ahmad Madaniyah, Ayham Usou, Muayad al-Ajaan, Ezikiyel Ham, Pablo Sabbag (Fahd Yusuf 70), Ammar Ramadan, Toir Kruma, Jalil Elias, Ibrohim Xesar, Abdulrahmon Vayss, Mahmud al-Asvad (Umar Harbin 70)
Bosh hakam: Ahmad al-Kaf (O‘mon)