Angliya Premyer-ligasi yillar davomida ko‘plab yulduzlarga makon bo‘lib kelmoqda. Ularning ayrimlari esa ingliz tuprog‘ida ulg‘ayib, kamolga yetishadi va yulduzga aylanadi. Ba’zi futbolchilar taqdir hukmi bilan o‘zi tarbiyalagan klub bilan qola olmaydi. Ammo ba’zi yulduzlar jonajon jamoalari sharafini himoya qilishda davom etadi. Quyida APL klublari tomonidan yetishtirilgan eng qimmat futbolchilarni bilib olasiz.
"Arsenal" – Bukayo Saka (103 million funt)
Saka bekorga "Starboy" laqabini olmagan. Ayni damda yosh hujumchi "Arsenal" va Angliya terma jamoasining muhim vakiliga aylanib ulgurdi. 2018/19 yilgi mavsumda debyut qilgan Saka, yildan yilga faqat o‘sib bordi. U hozirga kelib, nafaqat Angliyada, balki dunyoda ham eng qimmat futbolchilardan biri bo‘lib turibdi.
"Tottenxem" – Xarri Keyn (95 million funt)
Keyn joriy mavsumda o‘z klubini yangiladi. U Bundesligani yondirmoqda. Ammo ko‘plab rekordlar "Bavariya"ning yetakchiligi uchun yetarli bo‘lmadi. Keyn 100 million yevroga sotilgan edi. "Tottenxem" esa uning pulini tarkibni yaxshilash yo‘lida ishlatdi.
"Chelsi" – Deklan Rays (94 million funt)
"Chelsi" 2013 yilda kelajakning eng yorqin yulduzlaridan birini jamoadan xaydaydi. 14 yoshli o‘smir bo‘lib, jamoasiz qolgach, Rays o‘z baxtini boshqa yoqdan izlashga majbur bo‘ldi. "Vest Xem"da jahon darajasidagi yarim himoyachiga aylangach, Rays 2023 yilning yozida "Arsenal" tomonidan 105 million funtga sotib olindi. Hozir u Shimoliy London jamoasi bilan birga katta-katta sovrinlar uchun kurash olib bormoqda.
"Manchester Siti" – Fil Foden (93 million funt)
Biz uzoq vaqtdan beri Fodenni taniymiz. Nega shunday? Chunki u yoshligidan "shaharliklar" akademiyasidan yorib chiqqan. Joriy mavsumga kelibgina Foden Gvardiola jamoasining doimiy asosiy tarkibiga kira oldi. APLda 2023/24 yilgi mavsumda faqat Xoland va Alvares Fodendan ko‘ra ko‘proq gollarda ishtirok eta oldi xolos.
"Liverpul" – Aleksander-Arnold (60 million funt)
Trent doimgidek APLdagi eng yaxshi futbolchilar sirasiga kiradi. 25 yoshli qanot himoyachisi gibrid yarim himoyachiga aylanganidan beri, ham klub, ham mamlakat miqyosida ko‘proq foyda keltirmoqda. Aleksander-Arnold so‘nggi 11 ta bahsda jami 7 ta golda ishtirok etdi.
"MYU" – Markus Reshford (60 million funt)
Reshford joriy mavsumda qiyin davrni boshdan kechirdi. Nafaqat u, balki uning jamoasi ham muvaffaqiyatsiz davrga chidashga majbur edi. Ammo so‘nggi paytlarda biroz yaxshilanish ko‘zga tashlanmoqda. Masalan, APLning oxirgi 4 ta o‘yinida Reshford 4 ta golda qatnashdi. 26 yoshli hujumchini tezroq o‘z darajasiga qaytib olishini tilaymiz...
"Aston Villa" – Jek Grilish (60 million funt)
Grilishning "Manchester Siti"ga o‘tishi hamma uchun foydali bo‘ldi deyish mumkin. Masalan, "Aston Villa" uning xarididan 100 million funt ishlab olib, tarkibini kuchaytirdi. Grilish esa ko‘plab sovrinlar yutishga muvaffaq bo‘ldi. Birmingemliklar akademiyasidan chiqqan va eng ko‘p sovrin yutgan futbolchilar ichida Grilish yetakchiga aylandi.
ISMATOV J.
