"Napoli" prezidenti Aurelio De Laurentis joriy mavsum yakunida 29 yoshli yarim himoyachi Piotr Zelinski "Inter"ga o‘tishini aytdi. Biroq, hozircha bu haqda rasman e’lon qilinmagan.

“Pyotr - ajoyib yigit va juda yaxshi futbolchi. Agar u biz bilan qolishni istasa, biz uni quchoq ochib kutib olamiz. Ammo agar u ketishni istasa, bu uning pul hidini sezadigan agenti borligi uchundir. Aynan u yigit va uning oilasini "Napoli"ni tark etishga ko‘ndirgan. Men bir narsani ayta olaman: Zelinskiga "Inter"da oladiganidan ko‘ra ko‘proq maosh to‘lay olaman", - deya De Laurentisning so‘zlarini keltiradi Football Italia.

Eslatib o‘tamiz, avvalroq Polsha terma jamoasi futbolchisi "Napoli"ning shartnomani uzaytirish taklifini rad etgandi. Qayd etilishicha, neapolliklar Zelinskiga 5 million yevro maosh taklif qilishgan ("Inter" o‘z navbatida yarim himoyachiga mavsum uchun 4,5 million yevro to‘lashga tayyor). Shunga qaramay, polyak o‘z qarorini o‘zgartirmadi.