"Наполи" президенти Аурелио Де Лаурентис жорий мавсум якунида 29 ёшли ярим ҳимоячи Пиотр Зелиньски "Интер"га ўтишини айтди. Бироқ, ҳозирча бу ҳақда расман эълон қилинмаган.

“Пётр - ажойиб йигит ва жуда яхши футболчи. Агар у биз билан қолишни истаса, биз уни қучоқ очиб кутиб оламиз. Аммо агар у кетишни истаса, бу унинг пул ҳидини сезадиган агенти борлиги учундир. Айнан у йигит ва унинг оиласини "Наполи"ни тарк этишга кўндирган. Мен бир нарсани айта оламан: Зелиньскига "Интер"да оладиганидан кўра кўпроқ маош тўлай оламан", - дея Де Лаурентиснинг сўзларини келтиради Football Italia.

Эслатиб ўтамиз, аввалроқ Польша терма жамоаси футболчиси "Наполи"нинг шартномани узайтириш таклифини рад этганди. Қайд этилишича, неаполликлар Зелиньскига 5 миллион евро маош таклиф қилишган ("Интер" ўз навбатида ярим ҳимоячига мавсум учун 4,5 миллион евро тўлашга тайёр). Шунга қарамай, польяк ўз қарорини ўзгартирмади.