«Манчестер Сити» ҳужумчиси Эрлинг Холанд Энцо Фернандеснинг «Челси»дан «шаҳарликлар» сафига ўтгани ҳақидаги хабарга муносабат билдирди.

«Манчестер Сити» трансфер ойнаси ёпилиши арафасида 25 ёшли аргентиналик ярим ҳимоячи билан шартнома имзолаганини расман эълон қилди.

Клубнинг ижтимоий тармоқдаги ушбу хабарига Холанд ҳам изоҳ қолдириб, узоқ давом этган трансфер жараёни ниҳоят якунланганидан хурсандлигини ҳазиломуз тарзда ифода этди.

«Ҳа, ажойиб. Энди ниҳоят ухлашга кетсам бўлади», — деб ёзди норвегиялик ҳужумчи.

Энцо Фернандес «Манчестер Сити» билан 2031 йилга қадар мўлжалланган шартнома имзолади.

Трансфер қиймати 145 миллион евро атрофида баҳоланмоқда. Бу Англия Премьер-лигасидаги энг қиммат трансфер рекордига тенг натижа ҳисобланади.