Joriy yilning 1–10 fevral kunlari poytaxtimizda og‘ir atletika bo‘yicha kattalar o‘rtasida Osiyo chempionati bo‘lib o‘tadi.

Mazkur chempionatda Parij Olimpiadasining reyting ochkolari o‘ynaladi. Chempionatni har jihatdan yuqori saviyada tashkil etish borasida Sport vazirligi, Milliy olimpiya qo‘mitasi, O‘zbekiston og‘ir atletika federasiyasi va tegishli tashkilotlar tomonidan keng ko‘lamli tayyorgarlik ishlari olib borilmoqda.

"Parijda bo‘ladigan yozgi Olimpiya o‘yinlari reyting ochkolarini taqdim etadigan qit’a chempionatining yurtimizda tashkil etilayotgani o‘ziga xos voqelik, albatta. Musobaqalarda 34 ta mamlakatning 239 nafar sportchisi ishtirok etish talabnomalarini taqdim etgan. Musobaqalar poytaxtimizdagi «Yunusobod» sport majmuasida bo‘lib o‘tadi.

Toshkent bahslarida bir necha bor Olimpiya o‘yinlari g‘olibligiga erishgan, jahon chempioni, Osiyo o‘yinlari sovrindori indoneziyalik Eko Yuli Iravan, Olimpiya o‘yinlari g‘olibi, jahon chempioni, Osiyo o‘yinlari sovrindori qatarlik Fares Ibrahim, iste’dodli og‘ir atletikachilarimiz Akbar Jo‘rayev va Ruslan Nuriddinov kabi jahon og‘ir atletikasida o‘z o‘rniga ega bo‘lgan nomdor sportchilarning qatnashayotgani uning nufuzi nechog‘li yuqori ekanini ko‘rsatmoqda", — deydi O‘zbekiston og‘ir atletika federasiyasi xalqaro aloqalar bo‘limi boshlig‘i Azamat Sharipov.

Mazkur qit’a chempionati bahslarini kuzatib borish uchun yurtimizga Xalqaro og‘ir atletika federasiyasi prezidenti Muhammad Hasan Jalud, Osiyo og‘ir atletika federasiyasi prezidenti Muhammad Yusuf Al Mana, shuningdek, bir qator davlatlarning sport tashkilotlari mutasaddilari, milliy og‘ir atletika federasiyalarining rahbarlari tashrif buyuradi.

Musobaqalarni ommaviy axborot vositalarida keng yoritish uchun turli xorijiy davlatlardan jurnalistlarning kelayotgani Toshkent musobaqalariga xalqaro maydonda qiziqish yuqori ekanidan dalolatdir.

Ma’lumot uchun, Osiyo chempionati oldidan tashkil etiladigan matbuot anjumani 1 fevral soat 17:00 da «Yunusobod» sport majmuasida bo‘lib o‘tadi.

O‘zbekiston Og‘ir atletika federasiyasi matbuot xizmati