Жорий йилнинг 1–10 февраль кунлари пойтахтимизда оғир атлетика бўйича катталар ўртасида Осиё чемпионати бўлиб ўтади.

Мазкур чемпионатда Париж Олимпиадасининг рейтинг очколари ўйналади. Чемпионатни ҳар жиҳатдан юқори савияда ташкил этиш борасида Спорт вазирлиги, Миллий олимпия қўмитаси, Ўзбекистон оғир атлетика федерацияси ва тегишли ташкилотлар томонидан кенг кўламли тайёргарлик ишлари олиб борилмоқда.

"Парижда бўладиган ёзги Олимпия ўйинлари рейтинг очколарини тақдим этадиган қитъа чемпионатининг юртимизда ташкил этилаётгани ўзига хос воқелик, албатта. Мусобақаларда 34 та мамлакатнинг 239 нафар спортчиси иштирок этиш талабномаларини тақдим этган. Мусобақалар пойтахтимиздаги «Юнусобод» спорт мажмуасида бўлиб ўтади.

Тошкент баҳсларида бир неча бор Олимпия ўйинлари ғолиблигига эришган, жаҳон чемпиони, Осиё ўйинлари совриндори индонезиялик Эко Юли Ираван, Олимпия ўйинлари ғолиби, жаҳон чемпиони, Осиё ўйинлари совриндори қатарлик Фарес Ибраҳим, истеъдодли оғир атлетикачиларимиз Акбар Жўраев ва Руслан Нуриддинов каби жаҳон оғир атлетикасида ўз ўрнига эга бўлган номдор спортчиларнинг қатнашаётгани унинг нуфузи нечоғли юқори эканини кўрсатмоқда", — дейди Ўзбекистон оғир атлетика федерацияси халқаро алоқалар бўлими бошлиғи Азамат Шарипов.

Мазкур қитъа чемпионати баҳсларини кузатиб бориш учун юртимизга Халқаро оғир атлетика федерацияси президенти Муҳаммад Ҳасан Жалуд, Осиё оғир атлетика федерацияси президенти Муҳаммад Юсуф Ал Мана, шунингдек, бир қатор давлатларнинг спорт ташкилотлари мутасаддилари, миллий оғир атлетика федерацияларининг раҳбарлари ташриф буюради.

Мусобақаларни оммавий ахборот воситаларида кенг ёритиш учун турли хорижий давлатлардан журналистларнинг келаётгани Тошкент мусобақаларига халқаро майдонда қизиқиш юқори эканидан далолатдир.

Маълумот учун, Осиё чемпионати олдидан ташкил этиладиган матбуот анжумани 1 февраль соат 17:00 да «Юнусобод» спорт мажмуасида бўлиб ўтади.

Ўзбекистон Оғир атлетика федерацияси матбуот хизмати