"Rostov" va "Moskva" klublari sobiq bosh direktori Yuriy Belous Metaratings.ru saytiga bergan intervyusida O‘zbekiston terma jamoasining Osiyo kubogidagi ishtirokiga baho berdi.

«O‘zbekiston o‘z uyida o‘tkazilgan yoshlar o‘rtasidagi Osiyo chempionatida chempion bo‘lgandi. Ular barcha jamoalardan ko‘ra yaxshiroq o‘yin namoyish etishgandi. Ularning o‘yinini stadiondan tomosha qilgandim. Bu jamoa menga juda yoqadi.

2011 yilgi Osiyo kubogida O‘zbekiston 4-o‘rinni egallaganda Qatarda edim. O‘shanda tarkibda, masalan, Odil Ahmedov va ko‘p taniqli futbolchilar o‘ynagandi. O‘zbekiston terma jamoasining hozirgi o‘zagi esa asosan yosh futbolchilardan iborat. Ularning aksariyati RPLda o‘ynamoqda.

Ishonchim komil, futbolchilarning hozirgi avlodi o‘sha natijani takrorlashi, hatto yaxshilashi mumkin. Umid qilaman, aynan O‘zbekiston Osiyo kubogi g‘olibiga aylanadi», – dedi Belous.

Eslatib o‘tamiz, O‘zbekiston terma jamoasi Osiyo kubogi chorak finalida Qatarga qarshi maydonga tushadi. Bu bahs 3 fevral kuni bo‘lib o‘tadi.