Qatar terma jamoasi bosh murabbiyi Markes Lopes Osiyo kubogi chorak final bosqichi doirasida O‘zbekistonga qarshi bo‘ladigan o‘yinda g‘alabaga ishonayotganini aytib o‘tdi.

"O‘zbekistonga qarshi o‘yin asosan jismoniy jang bo‘ladi, deb o‘ylayman. O‘zbekiston terma jamoasining o‘yinchilarini juda yaxshi bilaman. "Al-Vakra" bosh murabbiyi bo‘lganimda Osiyo chempionlar ligasi musobaqasida bir necha marta ular bilan to‘qnash kelganmiz. Raqib futbolchilari qanday mahoratga ega ekanidan xabarim bor.

Eng muhimi, biz o‘z kuchimizga tayanamiz va o‘yinda g‘alaba qozonishga harakat qilamiz. O‘zbek futbolchilarida mahorat, sifat va tezlik bor. Aytib o‘tganimdek, bu jismoniy jihatdan jang bo‘ladi. Mening shogirdlarim esa jismoniy jihatdan yaxshi tayyorgarlikkka ega. Boz ustiga, guruh bosqichida men rotasiya qilish orqali ularning yaxshiroq tayyorgarlikka ega bo‘lishiga harakat qildim.

O‘z o‘z maqsadimizga erishib, chorak finalgacha yetib keldik. Agar kim Qatarni finalga chiqa olmaydi, deb o‘ylasa, bu uning ishi", — dedi ispaniyalik mutaxassis.