Osiyo kubogi chorak finalida Qatarga yutqazganimizdan so‘ng sharhlovchi Otabek Jo‘rayevning penaltini tepa olmagan Zafarmurod Abdirahmatovga nisbatan ishlatgan haqoratli so‘zlari butun OAVda tarqalgan edi.
Biroq keyinchalik sharhlovchining o‘zi ushbu vaziyatga izoh berdi.
"Assalomu alaykum va rohmatullohi va barokatuh!
So‘nggi chorak finaldan deyarli ikki kun o‘tdi. Stress qo‘yib yuborildi, hissiyotlar joyiga tushdi. Endi ishtirokimiz haqida o‘z fikrlarim bilan o‘rtoqlashsam bo‘ladi.
Ammo, bundan oldin menga eng muhim bo‘lgan narsaga e’tiborimni qaratmoqchiman. O‘sha o‘yindagi penaltini nazarda tutmoqdaman.
Avvalambor (!) men musulmonman. Alhamdulillah. Musulmon bo‘lib bu dunyoni tark etish nasib etsin. Amin. Va shu joyda men noto‘g‘ri ish qildim. Ehtimol, biror insonni, birodarimning dilini og‘ritdim.
Zafarmurod bilan aloqaga chiqdim. Uzr so‘radim. Masala yopildi. Qiyomatga qolmadi. Alhamdulillah. Mana endi o‘zimni yaxshi his qilmoqdaman.
Fursatdan foydalanib birodarlarimga, dindoshlarimga murojaat qilmoqchiman. Shayton bizni har kuni, har daqiqa, har soniya vasvasa qiladi. To‘g‘ri yo‘ldan adashmaylik. Bir-birimizga yordam beraylik va qo‘llab-quvvatlaylik. Zafarmurodni, qolganlarni ham "podderjka" qilaylik.
Assalomu alaykum va rohmatullohi va barokatuh", – degan Otabek Jo‘rayev o‘z telegram kanalida.
