Осиё кубоги чорак финалида Қатарга ютқазганимиздан сўнг шарҳловчи Отабек Жўраевнинг пенальтини тепа олмаган Зафармурод Абдираҳматовга нисбатан ишлатган ҳақоратли сўзлари бутун ОАВда тарқалган эди. 

Бироқ кейинчалик шарҳловчининг ўзи ушбу вазиятга изоҳ берди.  

"Aссалому алайкум ва роҳматуллоҳи ва барокатуҳ!

Сўнгги чорак финалдан деярли икки кун ўтди. Стресс қўйиб юборилди, ҳиссиётлар жойига тушди. Энди иштирокимиз ҳақида ўз фикрларим билан ўртоқлашсам бўлади.

Aммо, бундан олдин менга энг муҳим бўлган нарсага эътиборимни қаратмоқчиман. Ўша ўйиндаги пенальтини назарда тутмоқдаман.

Aвваламбор (!) мен мусулмонман. Aлҳамдулиллаҳ. Мусулмон бўлиб бу дунёни тарк этиш насиб этсин. Aмин. Ва шу жойда мен нотўғри иш қилдим. Эҳтимол, бирор инсонни, биродаримнинг дилини оғритдим.

Зафармурод билан алоқага чиқдим. Узр сўрадим. Масала ёпилди. Қиёматга қолмади. Aлҳамдулиллаҳ. Мана энди ўзимни яхши ҳис қилмоқдаман.

Фурсатдан фойдаланиб биродарларимга, диндошларимга мурожаат қилмоқчиман. Шайтон бизни ҳар куни, ҳар дақиқа, ҳар сония васваса қилади. Тўғри йўлдан адашмайлик. Бир-биримизга ёрдам берайлик ва қўллаб-қувватлайлик. Зафармуродни, қолганларни ҳам "поддержка" қилайлик.

Aссалому алайкум ва роҳматуллоҳи ва барокатуҳ", – деган Отабек Жўраев ўз телеграм каналида.